ລະຫວ່າງວັນທີ 02-06 ສິງຫາ 2022 ນີ້ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ໃນນາມຫົວໜ້າລັດຖະກອນອາຊຽນ ແຫ່ງ ສປປ ລາວ ພ້ອມດ້ວຍຫົວໜ້າກົມຄຸ້ມຄອງລັດຖະກອນ, ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ແລະ ພະນັກງານທີ່ກ່ຽວຂ້ອງ ໄດ້ເດີນທາງໄປຮ່ວມກອງປະຊຸມວຽກງານລັດຖະກອນອາຊຽນ ຄັ້ງທີ 21 ໂດຍແມ່ນ ກະຊວງພາຍໃນ ສສ ຫວຽດນາມ ເປັນເຈົ້າພາບຈັດຂຶ້ນທີ່ ນະຄອນຫຼວງຮ່າໂນຍ.
ການຈັດກອງປະຊຸມໃນຄັ້ງນີ້ ໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດແຜນການຮ່ວມມືວຽກງານລັດຖະກອນອາຊຽນ (2021-2025) ໃນໄລຍະຜ່ານມາ ແລະ ວາງແຜນການເຄື່ອນໄຫວໃນຕໍ່ໜ້າ ຮ່ວມກັບບັນດາປະເທດສະມາຊິກ, ປະເທດບວກ 3 ແລະ ປະເທດຄູ່ຮ່ວມເຈລະຈາ ເພື່ອເປັນການຮັດແໜ້ນສາຍພົວພັນ ແລະ ສົ່ງເສີມການຮ່ວມມືໃນວຽກງານຄຸ້ມຄອງລັດຖະກອນ. ໃນກອງປະຊຸມວຽກງານລັດຖະກອນຄັ້ງນີ້ ຍັງປະກອບມີກອງປະຊຸມຫຼາຍລະດັບ ເຊັ່ນ: ກອງປະຊຸມຫົວໜ້າລັດຖະກອນອາຊຽນ ເປັນກອງປະຊຸມລະດັບລັດຖະມົນຕີໃນຂະແໜງການລັດຖະກອນ, ມີກອງປະຊຸມເຈົ້າໜ້າທີ່ອາວຸໂສ, ກອງປະຊຸມປຶກສາຫາລືກ່ຽວກັບການມີສ່ວນຮ່ວມ ແລະ ຄວາມຫຼາກຫຼາຍໃນອົງກອນ, ກອງປະຊຸມສໍາມະນາກ່ຽວກັບການປົກຄອງທີ່ດີ ແລະ ອື່ນໆ.
ກອງປະຊຸມຄັ້ງນີ້ ບັນດາປະເທດສະມາຊິກ ແລະ ປະເທດຄູ່ເຈລະຈາ ໄດ້ພ້ອມກັນແລກປ່ຽນບົດຮຽນ ແລະ ປຶກສາຫາລືວຽກງານຄຸ້ມຄອງລັດຖະກອນ ເພື່ອຊອກຫາວິທີແກ້ໄຂບັນຫາທີ່ຍັງຄົງຄ້າງ, ທົບທວນ ແລະ ຕີລາຄາການຈັດຕັ້ງປະຕິບັດແຜນການຮ່ວມມືວຽກງານລັດຖະກອນອາຊຽນ (2021-2025), ປຶກສາຫາລືກ່ຽວກັບສາຍພົວພັນ ແລະ ການຮ່ວມມືລະຫວ່າງບັນດາປະເທດສະມາຊິກອາຊຽນ, ປະເທດບວກ3 ແລະ ປະເທດຄູ່ຮ່ວມເຈລະຈາ ຕໍ່ກັບວຽກງານລັດຖະກອນ ໃນການສົ່ງເສີມ ແລະ ຂະຫຍາຍການຮ່ວມມືວຽກງານດັ່ງກ່າວໃຫ້ກວ້າງຂວາງກວ່າເກົ່າ.
ນອກຈາກນີ້ ເພື່ອເພີ່ມທະວີ ແລະ ຮັດແໜ້ນສາຍພົວພັນແບບພິເສດລາວ-ຫວຽດນາມ ໂດຍສະເພາະ ສອງກະຊວງພາຍໃນ ສສ ຫວຽດນາມ ແລະ ສປປ ລາວ ຍັງໄດ້ຈັດກອງປະຊຸມພົບປະສອງຝ່າຍລະຫວ່າງຄະນະນໍາຂອງສອງກະຊວງພາຍໃນ ໃຫ້ການຕ້ອນຮັບໂດຍ ທ່ານ ນາງ Pham Thi Thanh Tra ລັດຖະມົນຕີກະຊວງພາຍໃນ ສສ ຫວຽດນາມ, ກອງປະຊຸມພົບປະຄັ້ງນີ້ ຄະນະຜູ້ແທນທັງສອງຝ່າຍ ໄດ້ປຶກສາຫາລືກ່ຽວກັບແຜນການຮ່ວມມືສອງຝ່າຍ ແລະ ທົບທວນຄືນບັນດາບົດບັນທຶກຄວາມເຂົ້າໃຈທີ່ໄດ້ເຊັນຮ່ວມກັນໃນເມື່ອກ່ອນ.
ໃນປີ 2023 -2024 ທີ່ຈະມາເຖິງນີ້ ສປປ ລາວ ຈະໄດ້ເປັນເຈົ້າພາບຈັດກອງປະຊຸມສໍາມະນາກ່ຽວກັບວຽກງານລັດຖະກອນ ຈໍານວນ 02 ຄັ້ງ ຄື: ການຈັດສໍາມະນາ-ຝຶກອົບຮົມແບບເອເລັກໂຕນິກທີ່ມີປະສິດທິພາບ ແລະ ກອງປະຊຸມກ່ຽວກັບການບໍລິຫານລັດແບບທັນສະໄໝ.

Leave a Reply