ໃນຄັ້ງວັນທີ 18-22 ກັນຍາ  2023 ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ, ກະຊວງພາຍໃນ ຮ່ວມກັບຫ້ອງວ່າການສູນກາງພັກ ໄດ້ຈັດພິທີເປີດຊຸດຝືກອົບຮົມຫຼັກສູດການບໍລິຫານຄຸ້ມຄອງລັດສໍາລັບຜູ້ບໍລິຫານລະດັບສູງໃຫ້ພະນັກງານນຳພາ-ຄຸ້ມຄອງພາຍໃນຫ້ອງວ່າການສູນກາງພັກ, ໃຫ້ກຽດການເປັນປະທານຂອງທ່ານ  ຄຳຜາ ພີມມະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ  ໂດຍມີຜູ້ເຂົ້່າຮ່ວມທັງໝົດ 31 ທ່ານ, ຍິງ 08 ທ່ານ, ພະນັກງານນຳພາ-ຄຸ້ມຄອງ ຂັ້ນກົມ, ວິທະຍາກອນ ທີ່ເປັນອາດີດລັດຖະມົນຕີ, ຮອງລັດຖະມົນຕີ, ຫົວໜ້າກົມ ຈາກກະຊວງພາຍໃນ, ກະຊວງການເງິນເຂົ້າຮ່ວມ.

ການຝຶກອົບຮົມຄັ້ງນີ້ ແມ່ນແນ່ໃສ່ສ້າງການຫັນປ່ຽນໃໝ່ ຢ່າງແຂງແຮງເລິກເຊິ່ງ, ຮອບດ້ານໃຫ້ແກ່ພະນັກງານການນຳຫຼັກແຫຼ່ງ ພາຍໃນຫ້ອງວ່າການສູນກາງພັກ ໃຫ້ມີບາດກ້າວໃໝ່ໃນການນຳພາທີ່ເຂັ້ມແຂງ ທັງເປັນການຍົກລະດັບຄວາມຮູ້ຄວາມສາມາດ, ທັກສະ, ທັດສະນະ, ພາວະຄວາມເປັນຜູ້ນຳ ໃຫ້ມີຄຸນນະພາບສູງຂຶ້ນ    ກວ່າເກົ່າ.  ກອງປະຊຸມຝຶກອົບຮົມ ຈະໄດ້ຮັບຟັງ, ຄົ້ນຄວ້າ ແລະ ແລກປ່ຽນບົດຮຽນກ່ຽວກັບວຽກງານການບໍລິຫານຄຸ້ມຄອງລັດທັງໝົດ 08 ບົດຮຽນຄື: (1) ການບໍລິຫານລັດ   ໃນລະບົບການເມືອງ, (2) ທິດສະດີການນຳພາ ແລະ ການຄຸ້ມຄອງ, (3) ການບໍລິຫານການປ່ຽນແປງ ເພື່ອຄວາມກ້າວໜ້າ, (4) ການວາງແຜນຍຸດທະສາດ, (5) ການຄຸ້ມຄອງພະນັກງານ-ລັດຖະກອນ,(6) ການປະເມີນຜົນ ແລະ ພັດທະນາພັດທະນາພະນັກງານ-ລັດຖະກອນ, (7)  ການຄຸ້ມຄອງ ແລະ ການກວດກາງົບປະມານແຫ່ງລັດ, (8) ການກວດກາ, ການກວດສອບ ແລະ ການຕ້ານການສໍ້ລາດບັງຫຼວງ.