ວັນທີ 18 ມີນາ 2022 ທີ່ ຫ້ອງປະຊຸມ ພະແນກໂຍທາທິການ ແລະ ຂົນສົ່ງ (ຍທຂ) ແຂວງວຽງຈັນ ໄດ້ຈັດພິທີປິດຊຸດຝຶກອົບຮົມການຄຸ້ມຄອງພະນັກງານ-ລັດຖະກອນ ຊຸດທີ 02 ໃຫ້ກຽດເປັນປະທານແມ່ນ ທ່ານ ຈັນທະລາ ພິມມະຈັກ ຄະນະພັກກະຊວງ ຫົວໜ້າກົມຈັດຕັ້ງ ແລະ ພະນັກງານ, ກະຊວງ ຍທຂ; ທ່ານ ປອ. ນາງ ຈັນທາ ອ່ອນໄຊວຽງ ຄະນະພັກກະຊວງ ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ, ກະຊວງພາຍໃນ; ມີ ທ່ານ ພູວອນ ບຸນວິໄລ ກໍາມະການພັກແຂວງ, ຫົວຫນ້າພະແນກໂຍທາທິການ ແລະ ຂົນສົ່ງ ແຂວງວຽງຈັນ, ບັນດາ ຫົວໜ້າ, ຮອງຫົວໜ້າຂະແໜງ ແລະ ວິຊາການ ທີ່ມາຈາກ ພະແນກ ຍທຂ 09 ແຂວງ (ພາກເໜືອ) ພ້ອມດ້ວຍຄະນະຮັບຜິດຊອບຈັດຝຶກອົບຮົມ ເຂົ້າຮ່ວມ.

ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ໄດ້ຮັບການເຊື້ອເຊີນບັນລະຍາຍຫົວຂໍ້ຕາມ ຫຼັກສູດຝຶກອົບຮົມດັ່ງກ່າວ ເຊິ່ງມີນັກວິທະຍາກອນ ຈໍານວນ 04 ທ່ານ ທີ່ມີຄວາມສາມາດ ແລະ ປະສົບການສູງ; ພິທີຝຶກອົບຮົມໄດ້ດໍາເນີນມາເປັນເວລາ 04 ວັນ (15-18 ມີນາ 2022) ກໍໄດ້ຮັບຜົນສໍາເລັດຢ່າງຈົບງາມ.

ການຝຶກອົບຮົມສໍາມະນາໃນຄັ້ງນີ້ ແນ່ໃສ່ເພື່ອເຮັດໃຫ້ພະນັກງານ-ລັດຖະກອນ ໄດ້ມີຄວາມຮູ້ພື້ນຖານກ່ຽວກັບການຄຸ້ມຄອງບຸກຄະລາກອນ, ການຄຸ້ມຄອງພະນັກງານ-ລັດຖະກອນ ຂອງ ສປປ ລາວ, ການປະເມີນຜົນ ແລະ ພັດທະນາພະນັກງານ-ລັດຖະກອນ, ພ້ອມທັງມີຄວາມເຂົ້າໃຈຢ່າງເລິກເຊິ່ງກ່ຽວກັບຄວາມຮູ້ພື້ນຖານວຽກງານກວດກາ ໃຫ້ເປັນລະບົບດຽວກັນ ເພື່ອສ້າງຄວາມສະດວກໃຫ້ແກ່ການຈັດຕັ້ງປະຕິບັດວຽກງານຕົວຈິງ.

Leave a Reply