ໂຄງປະກອບການຈັດຕັ້ງ

ພະແນກຄົ້ນຄວ້າວິທະຍາສາດການປົກຄອງມີໜ້າທີ່ ດັ່ງນີ້:

1. ຊ່ວຍສ້າງແຜນງານ, ແຜນການ ແລະ ໂຄງການຄົ້ນຄວ້າວິທະຍາສາດການປົກຄອງ, ການບໍລິຫານຄຸ້ມຄອງລັດ ແລະ ການຄຸ້ມຄອງພະນັກງານ-ລັດຖະກອນໃນແຕ່ລະໄລຍະ ເພື່ອໃຫ້ຫົວໜ້າສະຖາບັນສະເໜີລັດຖະມົນຕີກະຊວງພິຈາລະນາຮັບຮອງ;
2. ຈັດລຽງບູລິມະສິດຫົວຂໍ້ບົດຄົ້ນຄວ້າວິທະຍາສາດ ເພື່ອສະເໜີຄະນະສະຖາບັນພິຈາລະນາ;
3. ຄົ້ນຄວ້າ ແລະ ນໍາສະເໜີຄະນະສະຖາບັນພິຈາລະນາປະກາດໃຊ້ກ່ຽວກັບຂະບວນການ, ວິທີການ ແລະ ຂັ້ນຕອນໃນການດໍາເນີນການຄົ້ນຄວ້າວິທະຍາສາດການປົກຄອງ ໃນແຕ່ລະໄລຍະ, ພ້ອມທັງຈັດຕັ້ງປະຕິບັດໃຫ້ປະກົດເປັນຈິງ ເມື່ອໄດ້ຮັບອະນຸມັດແລ້ວ;
4. ດຳເນີນການສຶກສາ, ຄົ້ນຄວ້າ, ວິເຄາະ, ວິໄຈລະບົບການການປົກຄອງ, ການບໍລິຫານລັດ, ການຄຸ້ມຄອງພະນັກງານ-ລັດຖະກອນ ແລະ ວຽກງານທີ່ກ່ຽວຂອງ ຢ່າງເປັນລະບົບ, ປະຫວັດສາດຜ່ານມາ, ປະຈຸບັນ ແລະ ແຜນການໃນຕໍ່ໜ້າ;
5. ເກັບກຳ ແລະ ສັງລວມຂໍ້ມູນກ່ຽວກັບລະບົບການການປົກຄອງ, ການບໍລິຫານລັດ ແລະ ການຄຸ້ມຄອງພະນັກງານ-ລັດຖະກອນແລະວຽກງານກ່ຽວຂ້ອງເພື່ອນຳໃຊ້ເຂົ້າໃນການຄົ້ນຄວ້າ ແຕ່ລະໄລຍະ;
6. ນໍາສະເໜີ ແລະ ເຜີຍແຜ່ຜົນສຳເລັດໂຄງການຄົ້ນຄວ້າວິທະຍາສາດການປົກຄອງ, ການບໍລິຫານລັດ ແລະ ການຄຸ້ມຄອງພະນັກງານ-ລັດຖະກອນ ແລະ ການຄົ້ນຄວ້າຫົວຂໍ້ຕ່າງໆໃຫ້ພາກສ່ວນກ່ຽວຂ້ອງ.

ພະແນກພັດທະນາຫຼັກສູດມີໜ້າທີ່ດັ່ງນີ້:

1. ຊ່ວຍສ້າງແຜນການ, ແຜນງານ ແລະ ໂຄງການສ້າງ ແລະພັດທະນາຫລັກສູດຝຶກອົບຮົມວຽກງານບໍລິຫານຄຸ້ມຄອງລັດ ແລະ ວຽກງານອື່ນໆທີ່ກ່ຽວຂ້ອງໃນແຕ່ລະໄລຍະ;
2. ສຶກສາ, ຄົ້ນຄວ້າ, ວິເຄາະ, ວິໄຈ, ຄວາມຕ້ອງການການຝຶກອົບຮົມເພື່ອຮັບໃຊ້ເຂົ້າໃນການສ້າງ ແລະ ພັດທະນາເນື້ອໃນຫລັກສູດຝຶກອົບຮົມໃຫ້ພະນັກງານ-ລັດຖະກອນຕາມໂຄງຫລັກສູດທີ່ກົມປະເມີນຜົນ ແລະ ພັດທະນາລັດຖະກອນກຳນົດ; ກໍານົດຮູບແບບ, ກິດຈະກໍາ ແລະ ວິທີການຝຶກອົບຮົມ ເພື່ອປະກອບເຂົ້າໃນເນື້ອໃນ ຫລັກສູດໃຫ້ມີຄວາມສອດຄ່ອງ ແລະ ເໝາະສົມກັບເປົ້າໝາຍເຂົ້າຝຶກອົບຮົມ;
3. ສ້າງ ແລະ ພັດທະນາຫລັກສູດຝຶກອົບຮົມກ່ຽວກັບວຽກງານບໍລິຫານລັດ ແລະ ວຽກງານອື່ນໆ ທີ່ກ່ຽວຂ້ອງໃຫ້ສອດຄ່ອງກັບສະພາບການພັດທະນາຕົວຈິງແຕ່ລະໄລຍະ;
4. ດໍາເນີນການທົດລອງຈັດຝຶກອົບຮົມຫລັກສູດທີ່ສໍາເລັດໃນການສ້າງໃຫ້ເປົ້າໝາຍກ່ຽວຂ້ອງກ່ອນຂັ້ນຕອນນຳສະເໜີຂັ້ນເທິງພິຈາລະນາຮັບຮອງ;
5. ຄົ້ນຄວ້າ, ຄຸ້ມຄອງ, ປັບປຸງ, ຮຽບຮຽງ, ຫຼັກສູດຝຶກອົບຮົມໃຫ້ສອດຄ່ອງກັບສະພາບ ແລະ ເງື່ອນໄຂຕົວຈິງຂອງແຕ່ລະທ້ອງຖິ່ນ ແລະ ປະເມີນເນື້ອໃນຫຼັກສູດຝຶກອົບຮົມໃນແຕ່ລະຄັ້ງ;
6. ສົມທົບ ແລະ ຮ່ວມມືການສຳຫຼວດຄວາມຕ້ອງການ, ການກຳນົດຫົວຂໍ້ຫຼັກສູດ ແລະ ຂະບວນການປະມີນຜົນພາຍຫຼັງຝຶກອົບຮົມ 06 ເດືອນຫາ 01 ປີ ກັບພາກສ່ວນກ່ຽວຂ້ອງ ແຕ່ລະໄລຍະ;
7. ໃຫ້ຄຳແນະນຳ, ຕິດຕາມ , ກວດກາ ພະແນກຝຶກອົບຮົມ ແລະ ພາກສ່ວນກ່ຽວຂ້ອງໃນການຈັດຕັ້ງປະຕິບັດຫຼັກສູດການຝຶກອົບຮົມຂອງສະຖາບັນໃນແຕ່ລະໄລຍະ;
8. ສະເໜີຄະນະສະຖາບັນ ເພື່ອສັ່ງໂຈະການຝຶກອົບຮົມ ເມື່ອເຫັນໄດ້ວ່າມີການນຳໃຊ້ຫຼັກສູດທີ່ບໍ່ສອດຄ່ອງ ຫຼື ກະທຳຜິດຕໍ່ລະບຽບຂອງການຝຶກອົບຮົມ;
9. ລາຍງານການເຄື່ອນໄຫວວຽກງານຕ່າງໆຂອງພະແນກໃຫ້ຄະນະນໍາສະຖາບັນຊາບເປັນປົກກະຕິ.

ພະແນກຝຶກອົບຮົມ, ມີໜ້າທີ່ ດັ່ງນີ້:

1. ສ້າງແຜນການ, ແຜນງານ ແລະ ໂຄງການຝຶກອົບຮົມກ່ຽວກັບວຽກງານບໍລິຫານຄຸ້ມຄອງລັດ ແລະ ຫົວຂໍ້ຕ່າງໆໃຫ້ແກ່ພະນັກງານ-ລັດຖະກອນ, ຜູ້ບໍລິຫານລະດັບກາງ ແລະ ລະດັບສູງແຕ່ລະໄລຍະ;
2. ສຶກສາ, ຄົ້ນຄວ້າ ແລະ ກໍານົດລະບຽບ, ນຳໃຊ້ຮູບແບບກິດຈະກຳ ແລະ ວິທີການຝຶກອົບຮົມໃຫ້ມີຄວາມເໜາະສົມແລະ ສອດຄ່ອງກັບເປົ້າໝາຍຂົ້າຮ່ວມຝຶກອົບຮົມທຸກລະດັບ;
3. ຝຶກອົບຮົມລັດຖະກອນທີ່ມີຕໍາແໜ່ງບໍລິຫານ ແລະ ລັດຖະກອນທີ່ຮັບຕໍາແໜ່ງໃໝ່ ລະດັບສູງ ແລະ ກາງ ຂັ້ນສູນກາງ ແລະ ທ້ອງຖິ່ນ;
4. ສ້າງ ແລະ ພັດທະນາຄູຝຶກ ແລະ ຜູ້ຊ່ວຍຄູຝຶກ ທັງຂັ້ນສູນກາງ ແລະ ທ້ອງຖິ່ນຕາມຄວາມຮຽກຮ້ອງຕ້ອງການຕອບສະໜອງໄດ້ຕາມຫລັກສູດຕ່າງໆຂອງສະຖາບັນໃນແຕ່ລະໄລຍະ;
5. ສັງລວມ, ຄຸ້ມຄອງ, ສະໜອງ,ໃຫ້ຄຳແນະນຳ ແລະ ປະສານສົມທົບກັບພະແນກກ່ຽວຂ້ອງ ໃນການປ້ອນຂໍ້ມູນ ແລະ ພັດທະນາຖານຂໍ້ມູນ ສະຖິຕິກ່ຽວກັບລະບົບການຝຶກອົບຮົມຂອງສະຖາບັນໃຫ້ເປັນລະບົບ-ຄົບຊຸດ;
6. ຄົ້ນຄວ້າ, ສ້າງ, ປັບປຸງ, ຕິດຕາມ, ກວດກາ ແລະ ກຳນົດແບບຟອມການຝຶກອົບຮົມ-ປະເມີນຜົນການຝຶກອົບຮົມໃຫ້ມີຄວາມເໝາະສົມ ແລະ ສອດຄ່ອງແຕ່ລະໄລຍະ.

ພະແນກບໍລິຫານ ແລະ ຂໍ້ມູນຂ່າວສານ ມີໜ້າທີ່ ດ່ັ່ງນີ້:

1. ຊ່ວຍຄົ້ນຄວ້າ, ສັງລວມເປັນແຜນຍຸດທະສາດຂອງສະຖາບັນ ຫຼື ວຽກງານຄົ້ນຄວ້າການປົກຄອງ ແລະ ຝຶກອົບຮົມ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານຂອງສະຖາບັນແຕ່ລະໄລຍະ;
2. ສ້າງແຜນການ, ແຜນງານ ແລະ ໂຄງການກ່ຽວກັບວຽກງານບໍລິຫານ-ຂໍ້ມູນຂ່າວສານ, ສ້າງຖານຂໍ້ມູນ ແລະ ລະບົບຫໍສະໝຸດໃຫ້ເປັນລະບົບ ແລະ ທັນສະໄໝ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານລວມຂອງສະຖາບັນ ແຕ່ລະໄລຍະ;
3. ນໍາສະເໜີຄະນະສະຖາບັນກ່ຽວກັບການສຶກສາ, ຄົ້ນຄວ້າການປັບປຸງກົງຈັກການຈັດຕັ້ງ, ແຜນຄວາມຕ້ອງການພະນັກງານ, ແຜນການພັດທະນາ-ກໍ່ສ້າງພະນັກງານ ແລະ ການກໍານົດຕໍາແໜ່ງງານແຕ່ລະໄລຍະ;
4. ຄົ້ນຄວ້າ ແລະ ສະເໜີຄະນະສະຖາບັນການເລື່ອນຊັ້ນ-ຂັ້ນ, ການປະຕິບັດວິໄນ ແລະ ນະໂຍບາຍຕໍ່ພະນັກງານ-ລັດຖະກອນ ເປັນຕົ້ນ: ວຽກງານປະເມີນຜົນ, ການຍ້ອງຍໍ, ການຍົກຍ້າຍ, ລຶບຊື່ ແລະ ລາອອກ ຕາມກົດໝາຍ ແລະ ກົດລະບຽບທີ່ກໍານົດໃວ້;
5. ເປັນໃຈກາງການປະສານງານ ແລະ ຈັດຕັ້ງປະຕິບັດວຽກງານບໍລິຫານ-ພິທີການ, ການເງິນ, ຄຸ້ມຄອງຊັບສິນ, ຄຸ້ມຄອງເອກະສານເຂົ້າ-ອອກ, ຕາປະທັບ, ແຈກຢາຍ ແລະ ສະໜອງເອກະສານຂອງ ສະຖາບັນ;
6. ຊຸກຍູ້, ຕິດຕາມ, ກວດກາການປະຕິບັດແຜນການ-ໂຄງການຂອງບັນດາພະແນກພາຍໃນສະຖາບັນ ແຕ່ລະໄລຍະ;
7. ຄຸ້ມຄອງ ແລະ ພັດທະນາຖານຂໍ້ມູນກ່ຽວກັບວຽກງານຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ; ເກັບກຳ, ສັງລວມ, ສະຖິຕິບັນດາປື້ມຄູ່ມື ແລະ ຕຳລາຕ່າງໆຂອງສະຖາບັນໃຫ້ເປັນລະບົບ;
8. ຄຸ້ມຄອງຂໍ້ມູນ-ຂ່າວສານກ່ຽວກັບວຽກງານຄົ້ນຄວ້າ ແລະ ຝຶກອົບຮົມ, ພັດທະນາໂປແກຼມ, ໄອທີ ເວັບໄຊ໌, ສ້າງເປັນວາລະສານ, ວີດີໂອ ແຜນພັບ ແລະ ຮູບເຫລັ້ມ ເພື່ອຕອບສະໜອງໃຫ້ແກ່ສະຖາບັນການສຶກສາ, ສະຖາບັນການພັດທະນາ, ການຈັດຕັ້ງພາກລັດ, ນັກຄົ້ນຄວ້າ ແລະ ສັງຄົມທັງພາຍໃນ ແລະ ຕ່າງປະເທດ;
9. ປະສານງານ ແລະ ອຳນວຍຄວາມສະດວກໃນການເຄື່ອນໄຫວວຽກງານທາງລັດຖະການທັງພາຍໃນ ແລະ ຕ່າງປະເທດໃຫ້ແກ່ພະນັກງານ-ລັດຖະກອນພາຍໃນສະຖາບັນ;
10. ເປັນໃຈກາງໃນການພົວພັນ-ຮ່ວມມື, ປະສານງານ, ອຳນວຍຄວາມສະດວກໃນການເຄື່ອນໄຫວວຽກງານທາງລັດຖະການທັງພາຍໃນ ແລະ ຕ່າງປະເທດຂອງສະຖາບັນ;
11. ຮັບປະກັນ ໃນການສ້າງເງື່ອນໄຂຕ່າງໆ ທີ່ຈຳເປັນສຳລັບການເຮັດວຽກຂອງຄະນະສະຖາບັນ, ບັນດາພະແນກ ແລະ ພະນັກງານວິຊາການຂອງສະຖາບັນ ບົນພື້ນຖານປະຍັດ, ຕ້ານການຟູມເຟືອຍ, ຄວາມສະຫງົບ ແລະ ປອດໄພພາຍໃນສະຖາບັນ.