ພະນັກງານການນໍາຂັ້ນພະແນກ ແລະ ທຽບເທົ່າ ທີ່ຂຶ້ນກັບກະຊວງການເງິນເຂົ້າຮ່ວມ ຝຶກອົບຮົມການບໍລິຫານ ຄຸ້ມຄອງລັດ ຊຸດທີ 02

ຈຸດປະສົງ ການຝຶກອົບຮົມໃນຄັ້ງນີ້ ກໍເພື່ອເສີມສ້າງໃຫ້ພະນັກງານການນຳຂັ້ນພະແນກ ແລະ ທຽບເທົ່າໃຫ້ມີຄວາມຮູ້ໃນການຄຸ້ມຄອງ, ນຳພາ ເສີມສ້າງທັກສະດ້ານຄວາມສາມາດໃນການຄຸ້ມຄອງ, ການນໍາພາທີ່ຈໍາເປັນບາງຕຳແໜ່ງ, ຄວາມຕ້ອງການຂອງວຽກງານການນຳຂັ້ນພະແນກ, ຫ້ອງການ ແລະທຽບເທົ່າຂອງທ້ອງຖິ່ນ. ເສີມສ້າງຄວາມຮູ້, ທັກສະທີ່ຈຳເປັນ, ຄວາມຮູ້ດ້ານຈັນຍາບັນ–ຈັນຍາທຳຂອງພະນັກງານ, ປະກອບສ່ວນສ້າງລະບົບການເຮັດວຽກທີ່ເໝາະສົມຂອງການນຳສຳລັບເປົ້າໝາຍຜູ້ເຂົ້າຮ່ວມຝຶກອົບຮົມໃນຄັ້ງນີ້ມີພະນັກງານການນຳຂັ້ນພະແນກ ທຽບເທົ່າພະນັກງານວາງແຜນການນຳ ທີ່ຂື້ນກັບກະຊວງການເງິນ ຈຳນວນ 30 ທ່ານ ໄລຍະການຝຶກອົບຮົມການບໍລິຫານ ຄຸ້ມຄອງລັດ ການນຳຂັ້ນພະແນກ ແລະ ທຽບເທົ່າຊຸດທີ 02 ປະຈຳປີ 2022 ແມ່ນໃຊ້ເວລາ  20 ວັນ ເທົ່າກັບ 160 ຊົ່ວໂມງ ການຝຶກອົບຮົມ ຈະໄດ້ຄົ້ນຄວ້າຮໍ່າຮຽນທັງໝົດ 03 ພາກຄື: ເຊື່ອມຊຶມກຳແໜ້ນແນວທາງນະໂຍບາຍ, ຄວາມຮູ້ທົ່ວໄປ, ຄວາມຮູ້ວິຊາເພາະ.ທັງນີ້ກໍ່ເພື່ອເຮັດໃຫ້ກໍາແໜ້ນ ເຊື່ອມຊຶມ ແນວທາງນະໂຍບາຍຂອງພັກ; ເຂົ້າໃຈເລິກເຊິ່ງກ່ຽວກັບແນວຄິດ, ທິດສະດີການບໍລິຫານການປ່ຽນແປງ, ກາຍນໍາໄປໝູນໃຊ້ເຂົ້າໃນການປະຕິບັດໜ້າທີ່ການເມືອງທີ່ຖືກມອບໝາຍຂອງຂະແໜງການຕົນຢ່າງມີປະສິດທິຜົນ, ສາມາດກໍາໄດ້ແນວຄິດ–ທິດສະດີການນໍາພາ ແລະ ການຄຸ້ມຄອງ; ຄຸນລັກຊະນະ ແລະ ຮູບແບບການນໍາພາທີ່ດີ ເພື່ອເປັນທິດທາງປັບປຸງວິທີການການຊີ້ນໍາ–ນໍາພາ ເປັນເອກະພາບກ່ຽວກັບຫຼັກການ ແລະ ຂະບວນການສ້າງແຜນຍຸດທະສາດ, ແຜນການປະຈໍາຂອງຂະແໜງການ,  ສາມາດເຂົ້າໃຈກ່ຽວກັບຈັນຍາບັນ ແລະຄ່ານິຍົມ ໃນການປະຕິບັດງານ, ຈັນຍາບັນຂອງພະນັກງານ–ລັດຖະກອນ, ການຄຸ້ມຄອງພະນັກງານ–ລັດຖະກອນ, ການໝູນໃຊ້ຫຼັກການ ແລະ ວິທີການຄຸ້ມຄອງ ປະເມີນຜົນການປະຕິບັດງານຂອງພະນັກງານ ໃນຂະແໜງການຂອງຕົນໃຫ້ມີປະສິດທິຜົນ.ໂອກາດດັ່ງກ່າວ, ທ່ານ ສົມບູນ ອິນທະປັດຖາ ຍັງໄດ້ໂອລົມ ແລະ ຍັງໄດ້ເນັ້ນໜັກ: ໃຫ້ບັນດາຜູ້ເຂົ້າຮ່ວມຝຶກອົບຮົມ ຈົ່ງເສີມຂະຫຍາຍຈິດໃຈ ເປັນເຈົ້າຕົນເອງ ໃນການຄົ້ນຄວ້າ ຮ່ຳຮຽນ ພະຍາຍາມຍາດເວລາຄົ້ນຄວ້າ ແລະ ອ່ານເອກະສານໃຫ້ເລິກເຊິ່ງ, ຕັ້ງໃຈຮັບຟັງການບັນຍາຍ ຂອງວິທະຍາກອນ, ເພີ່ມທະວີແລກປ່ຽນຄວາມຄິດ ຄວາມເຫັນ ແລະ ຖອດຖອນບົດຮຽນນຳ ວິທະຍາກອນ ແລະສຳມະນາກອນດ້ວຍກັນ, ພ້ອມກັນເກັບກ່ຽວເອົາໝາກຜົນຂອງການຝຶກ ອົບຮົມໃນຄັ້ງນີ້ ໃຫ້ໄດ້ຫຼາຍທີ່ສຸດ. ນອກຈາກນັ້ນ, ບັນດາສຳມະນາກອນຕ້ອງໄດ້ພ້ອມກັນຕັ້ງໜ້າ ປະຕິບັດລະບຽບຂອງການຝຶກອົບຮົມແຕ່ຕົ້ນຈົນສຳເລັດ, ພ້ອມກັນຜ່ານຜ່າຄວາມຫຍຸ້ງຍາກນາໆ ປະການ ເພື່ອເຮັດສໍາເລັດໜ້າທີ່ໃນການຝຶກອົບຮົມຄັ້ງນີ້ຕາມລະດັບຄາດໝາຍ, ການເຂົ້າຮ່ວມຝຶກອົບຮົມຕ້ອງດຳເນີນໄປປົກກະຕິ ຕໍ່ເນື່ອງບໍ່ໃຫ້ຂາດຮຽນ, ຕ້ອງຮຽນ ຄົບຖ້ວນຕາມເວລາທີ່ກຳນົດໄວ້ ໃນໂຄງການຫຼັກສູດ, ສ່ວນວຽກງານທີ່ຕົນເອງຮັບຜິດຊອບແມ່ນ ຕ້ອງໄດ້ມອບໃຫ້ຜູ້ປະຈຳການແທນຢ່າງຂາດຕົວ ໃນຊ່ວງໄລຍະຝຶກອົບຮົມຄັ້ງນີ້, ສໍາລັບຄະນະຮັບຜິດຊອບຊຸດຝຶກອົບຮົມ ຕ້ອງໄດ້ເອົາໃຈໃສ່ຕິດຕາມ ຢ່າງໃກ້ສິດຕິດແທດ, ຄຸ້ມຄອງແລະ ອຳນວຍຄວາມສະດວກໃນທຸກດ້ານ ເພື່ອເຮັດໃຫ້ບັ້ນຝຶກອົບຮົມໃນຄັ້ງນີ້ມີ ຜົນສຳເລັດອັນຈົບງາມ, ເພື່ອເຮັດໃຫ້ການຄົ້ນຄວ້າຮໍ່າຮຽນໄດ້ດຳເນີນປົກກະຕິ ແລະ ຮັບປະກັນ ດ້ານຄຸນນະພາບ, ເຂັ້ມງວດຕໍ່ລະບຽບການຝຶກອົບຮົມ ໂດຍສະເພາະແມ່ນເວລາທີ່ໄດ້ກຳນົດໄວ້ໃນໂຄງການຫຼັກສູດ.