ພິທີເປີດຊຸດຝຶກອົບຮົມການນຳຂັ້ນກົມ ແລະ ທຽບເທົ່າ ຊຸດທີ 1 ປະຈຳປີ 2022 ໃຫ້ແກ່ພະນັກງານກະຊວງການເງິນ

ໃນວັນທີ 14 ມີນາ 2022, ທີ່ສະຖາບັນການເງິນ-ການບັນຊີ, ກະຊວງການເງິນ ໄດ້ຈັດຊຸດຝຶກອົບຮົມໃຫ້ການນຳຂັ້ນກົມ ແລະ ທຽບເທົ່າ ຊຸດທີ 1 ປະຈຳປີ 2022 (14-25 ມີນາ 2022) ໂດຍການເປັນປະທານເປີດຊຸດຝຶກອົບຮົມຂອງ ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ, ມີທ່ານ ປອ. ນາງ ຈັນທາ ອ່ອນໄຊວຽງ ຄະນະພັກກະຊວງ, ຫົວໜ້າ ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ, ກະຊວງພາຍໃນ ພ້ອມດ້ວຍວິທະຍາກອນ ແລະ ນັກສຳມະນາກອນ ຈາກບັນດາກົມ, ສະຖາບັນ, ພະແນກການເງິນ 6 ແຂວງ, ວິທະຍາໄລການເງິນພາກເໜືອ ແລະ ພາກໃຕ້ ເຂົ້າຮ່ວມທັງໝົດ 23 ທ່ານ.

ເພື່ອປະຕິບັດຕາມການເຊື້ອເຊີນຂອງຫ້ອງການ, ກະຊວງການເງິນ; ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມຈຶ່ງໄດ້ສະໜອງຄູຝຶກທີ່ມີປະສົບການສູງ ພ້ອມດ້ວຍຫຼັກສູດຜູ້ບໍລິຫານລະດັບສູງທີ່ຕິດພັນນໍາຫົວຂໍ້ການຝຶກອົບຮົມ; ຜູ້ເຂົ້າຮ່ວມຈະໄດ້ຄົ້ນຄວ້າຮໍ່າຮຽນທັງໝົດ 3 ພາກຄື: ເຊື່ອມຊຶມກໍາແໜ້ນແນວທາງນະໂຍບາຍ; ພາກຄວາມຮູ້ທົ່ວໄປ ແລະ ພາກວິຊາສະເພາະ. ເພື່ອເສີມສ້າງໃຫ້ພະນັກງານການເງິນ ສາມາດກໍາໄດ້ແນວຄິດ-ທິດສະດີການນໍາພາ ແລະ ການຄຸ້ມຄອງ, ຄຸນລັກສະນະ ແລະ ຮູບແບບການນໍາພາທີ່ດີ ເພື່ອເປັນທິດທາງປັບປຸງວິທີການນຳພາໃຫ້ມີປະສິດທິພາບສູງຂຶ້ນ, ສາມາດເຂົ້າໃຈຈັນຍາບັນ ແລະ ຄ່ານິຍົມໃນການປະຕິບັດວຽກງານ, ຈັນຍາທຳຂອງພະນັກງານ-ລັດຖະກອນ, ການສ້າງແຜນຍຸດທະສາດ; ສ້າງຄວາມຮັບຮູ້ ແລະ ເຂົ້າໃຈວຽກງານຄຸ້ມຄອງພະນັກງານ-ລັດຖະກອນ, ສະພາບການຄຸ້ມຄອງພະນັກງານ-ລັດຖະກອນ ໝູນໃຊ້ຫຼັກການ ແລະ ວິທີການໃນການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ໃນຂະແໜງ ການຕົນໃຫ້ມີປະສິດທິຜົນ; ນອກນັ້ນ ເພື່ອໃຫ້ກໍາໄດ້ ແລະ ເຂົ້າໃຈເຖິງລະບຽບກົດໝາຍ, ຂັ້ນຕອນ, ວຽກງານການຂອງຂະແໜງການເງິນ ເພື່ອເປັນຂໍ້ມູນໃນການສ້າງແຜນງົບປະມານປະຈຳປີ ແລະ ຈັດສັນງົບປະມານຂອງຂະແໜງການຕາມຄວາມເໝາະສົມ.

ໃນພິທີ ທ່ານ ບຸນໂຈມ ອຸບົນປະເສີດ ໄດ້ກ່າວຊົມເຊີຍບັນດາວິທະຍາກອນ ແລະ ນັກສຳມະນາກອນ ທີ່ໄດ້ມີຄວາມຕັດສິນໃຈສູງເຂົ້າຮ່ວມຊຸດຝຶກອົບຮົມ ເຊິ່ງເປັນການຍົກລະດັບຄວາມຮູ້ຄວາມສາມາດໃນການນຳພາ-ຄຸ້ມຄອງໃຫ້ເປັນພະນັກງານຫຼັກແຫຼ່ງຂອງກະຊວງການເງິນ ແລະ ເຊື່ອໝັ້ນວ່າ ບັນດານັກສຳມະນາກອນຈະເຂົ້າໃຈທິດຊີ້ນຳຂອງພັກ, ການນຳພາຂອງລັດຖະບານ ໃນສະພາບການທີ່ພັກ ແລະ ລັດເຮົາພວມປະເຊີນກັບຄວາມທ້າທາຍຫຼາຍດ້ານ ຊຶ່ງຈະຕ້ອງໄດ້ມີຄວາມຕັດສິນໃຈສູງ ເປັນເອກະພາບນຳກັນ ໂດຍສະເພາະ ການສ້າງທ່າຫັນປ່ຽນໃໝ່ ພາຍໃຕ້ການນຳພາຂອງພັກ, ການບໍລິຫານຂອງລັດ ກໍຄືການຫັນເປັນທັນສະໄໝ, ແນ່ນອນແລ້ວວ່າຈະຕ້ອງໄດ້ລົງເລິກ, ຜັນຂະຫຍາຍ, ເຊື່ອມຊຶມມະຕິຕ່າງໆຂອງພັກ, ກົດໝາຍຂອງລັດ, ພ້ອມກັນຄົ້ນຄວ້າໃຫ້ເລິກເຊິ່ງກວ່າເກົ່າ.